Eendag op 'n reendag

 Laasweek het die Liewe Heer dit goedgedink  om vir my 'n afdag te gee. Donderdag is mos wasdag hier by my, en toe reën dit! Ek het 'n tuimeldroeër ('n oue; het hom gekoop net voor my noointjieskind se geboorte) maar ek gebruik dit net wanneer dit nie anders kan nie. 'n Goeie vriendin het onlangs 'n ouma geword, toe trek ek my wolmandjie nader, en hekel en hekel en brei, die hele Donderdagmiddag om, en sommer Vrydagoggend ook.

 Hierdie foto's is nie vreeslik mooi nie, dis met my selfoon-kamera geneem, maar julle kan darem 'n idee kry. Die mussies lyk baie klein, maar dis vir 'n slinternuwe babatjie.

 'n Ligpienke met 'n strik

 'n Liggroene met 'n gelukkige geel blom en 'n oorgtrekte knoop;

En een in kuikentjie-geel met 'n yslike blom.

Die model vir hierdie foto's is Amy, my pragtige porselein baba-pop. Ja, ek is 'n ou poplap wat nog popspeel, en ek is nie skaam om dit te noem nie. 

Dit was 'n absolute plesier om hierdie mussies te knutsel, en ek is baie bly ek het nog baie dogtertjies in my lewe van alle ouderdomme, sodat ek nog 'n paar kan maak.

5 Dinge

1) Ek kan lekkerder kos maak as die meeste restaurante. Ja ek weet dis nie vreeslik beskeie om dit te noem nie, maar hierdie is 'n eerlike blog, en feite is feite.

(hierdie is gort risotto met geroosterde groente, pampoensaad en feta.)

Maar ek hou nog steeds daarvan om te gaan uiteet, want
a) dan hoef ek nie agterna op te ruim nie en
b) my man moet bly sit terwyl ons wag vir ons kos, want hy kan nie by Mimmo's of by die Spur gou gaan bossies uittrek, of 'n stuk hout gaan saag nie.

2) Ek sukkel om my aandag by een ding te bepaal. Op enige gegewe tydstip het ek
-  breiwerk, hekelwerk, borduurwerk en masjienwerk. Soms selfs meer as een projek in elke kategorie. 
-  minstens 10 kortverhale in wording, en twee halfgeskryfde boeke.
- 'n hoop boeke in my bedkassie wat ek gelyktydig lees.

 My bedkassie op die oomblik

3)Ek hou van notaboeke, en ek skryf daagliks allerhande dinge neer. Ek het o.a.

-'n Joernaal waarin ek goed skryf wat ek kan lees as ek oud is, of as ek wonder waar is die tyd heen.
-'n Boekie waarin ek aanhalings neerskryf, en stukkies uit boeke wat vir my treffend is. Ek het al 'n paar volgeskryf.

-'n Dankbaarheidjoernaal waarin ek my seëninge tel.

-'n Notaboek waarin ek enigeiets skryf wat in my kop kom. Soms is dit wroeginge, soms net onsamehangende gedagtes, sommer enige-iets wat in my kop kom. Dis soort van terapie. Ek het al 'n hele bondel daarvan. Dis saam vasgebind met 'n nota daarop wat se moenie lees nie, verbrand. En ek weet enige-iemand wat dit waag om dit te lees sal nooit weer dieselfde wees nie.

-'n Boekie waarin ek my vreemde drome neerskryf, maar ek doen dit nie so gereeld nie. Toe ek klein was het my oupa Thys elke liewe oggend vir my gevra wat het ek gedroom. Dan vertel hy vir my wat het hy gedroom, ook.
My drome is, wel,  plain weird. Dis beter om dit neer te skryf as om ander mense daarmee te verveel. Die enigste persone wie ek ken wat lyk of hulle dit wil hoor, is pasella sus Stephanie, en my sussie, Doortjie! My man en dogter verduur dit gelate.  My seun rol sy oë en sê 'Ag vader tog' en verklaar my dan, (kenner op die gebied van die menslike psige wat hy is), as ek klaar vertel het, as 'severely disturbed'.  

-'n Lysieboek waarin ek goed opskryf wat ek moet doen.

-'n Luukse boekie vir gedigte wat vir my mooi is.

En ek dink ek kort 'n boekie waarin ek kan opskryf waarvoor al die boekies is (grappie).

 My skryfboeke

 4) Al die grimering wat besit pas in die een laai. (My liewe vriendin Elsie was erg verbaas hieroor, en toe ek ander daaroor uitvra, het ek besef ek is redelik uniek wat dit aanbetref. Ek vermoed my sus se mooimaakgoed wat sy in haar handsak met haar saamdra, sal nie eers daarin pas nie.)

 

 My grimering

5) Soms gaan daar weke om wat hierdie poplap nie naby 'n stoflap kom nie. Want ek raak maklik hierin verlore:

Watter 5 dinge oor jouself wil jy met my deel? Toe, ons is almal vriende hier- vertel maar!

Beloftes maak skuld

Siende dat Anzelle laasjaar op haar verjaardag getroud is, het ek nie vir haar verjaarkoek gebak nie, maar het belowe om dit op 'n later stadium te doen.As daar een ding is wat daardie noointjieskind van my nooit sal vergeet nie, is dit die belofte van koek!
 Die woorde: 'What are little girls made of... sugar and spice and all things nice' is sekerlik met my kind in gedagte geskryf. So, ek het my rekenaar nadergetrek, "Red Velvet Cake" geGoogle, en my resepteboeke gefynkam, uiteindelik my voorskoot aangestrik en 'n koek gebak. Dit was pragtig, en nog lekkerder as wat dit gelyk het. Klam, met 'n sjokolade-smakie, en perfek gerys.

Die grootste gedeeltes van die resep kom uit 'Koeke ter viering van Liefde en Lewe' van Callie Maritz en Mari-Louise Guy.  Ek het die hoeveelheid kakao in die oorspronklike resep vermeerder, omdat ek dit nie kon proe nie, en miskien so 'n bietjie meer kleursel ingegooi. Die Roomkaasversiering kom ook uit hulle boek, en is een van daai resepte wat ek al uit my kop uit ken, so gereeld maak ek dit.


Rooi Fluweel Koek 

Verhit die oond tot 180
Berei 3 laagkoekpanne

Bestanddele:

350g meel
300g suiker
5ml koeksoda
75ml kakao
5ml sout
250ml karringmelk
2 eiers
375ml kookolie
5ml asyn
25ml rooi koekleursel
5ml vanielje

Klits eiers, suiker, olie, karringmelk, koekkleursel, asyn en vanielje saam
Sif kakao, meel, koeksoda, bakpoeier en sout saam
Meng nat en droee bestanddele
Verdeel eweredig in die drie panne
Bak vir so 40 min
(Hier kom nie bakpoeier in nie!)



(Ek het die koeklae in die vrieskas gesit voordat ek dit versier het. Dit help gewoonlik dat die koek nie soveel krummel nie.)

Versier met Roomkaas versiering

250ml Roomkaas
250g sagte botter
280g Versiersuiker
5ml vanielje  

Meng tot glad, versier die dieprooi fluweelkoek daarmee.
 NB die koek op die foto in die resepteboek is ook met rooi roosblare versier. Dis Pragtig, maar maak seker die rose is nie gifstowwe gespuit nie, en dat dit goed gewas is voordat jy dit gebruik.

Ek het heerlik gespeel

 met al my wolle en krale en gare, en vir Melanie 'n persent gemaak vir haar verjaardag, vir haar spiksplinternuwe huis.

Ek het blommetjies gehekel 

 

 

en blare, en stingeltjies

 dit alles vasgestik op materiaal

en versier met krale, knope en gare

 

 

en twee vriendelike kussingtjies gemaak.

 

'n Kaalvoet bruid met 'n rooi rooi rok

Anzelle

'n  Droomkamer om in aan te trek

Ietsie geleen.

Anzelle se Verjaardagrosie

Trouskoene

'n Prentjie

Sê net Ja

Ons gesin

 

Hierdie pragtige boonste foto's is deur Antoinette geneem.

Die volgende foto's is deur Willem, Ryan en Ryan se pa geneem: 

'n Tafel in die tuin

Blomme

Geskenkekis

Gekleurde papierlanterns.

Feetjiekoek

Anzelle se mocha-speserykoek.

.

Perfekte skuimpie-sampioene.

Dit was geheel en al 'n selfdoen troue. Anzelle en Ryan wou dit klein en persoonlik hou. Ek het die rok gemak, en Anzelle het die koek gebak. Ons het tafels gehuur, en dit aan ons lang buitetafel gelas. Ons het 10 stoele by Gerdi geleen, en die res uit ons huis bymekaargemaak. Nog 'n vriendin, Marietjie het die blomme vir ons gedoen, en ons het lang wit tafeldoeke ook by Gerdi geleen. Pasella-Ma Christine het toegelaat dat ek in haar doilie-laai snuffel, vir gehekelde doilies wat ons vir plekmatjies gebruik het. 
Ons het bome vol stringe liggies (hulle werk met batereie), papierlanterns, en flesse met kerse gehang. Ek en Willem het die pasteie gemaak, en ouma, ma en sussie het hand bygesit met die bykosse. Pasella sussies en Ma het vir snoephappies gesorg. My ma en Sussie het die tafels gedek terwyl ek Anzelle se hare en grimering gedoen het. Stefan en twee vriende was kelners. ons swaers het die lanterns ens aangesteek. 
Ek het Anzelle se hare en grimering gedoen, en Willem het die huwelik seremonie gedoen.